Snorri Sturluson var frumkvöðull!

Fór í gott ferðalag um Borgarfjörðinn í gær.  Byrjaði reyndar á að skunda á Þingvöll, við Öxará, og treysta mín heit.  Því næst var keyrt, sem leið lá upp á Kaldadal og þar var bar fyrir augu stórbrotið landslag.  Dalurinn var samt ekkert kaldur.  Á þessari leið bar fyrir augu fjall sem heitir því skemmtilega nafni OK.  En eins og flestir vita þá er orðið OK, liggur við, daglega notað í samskiptum fólks á milli, t.d. á msn spjallinu svo og í sms skeytum.  Hann hefur verið langt á undan sinni samtíð sem skírði fjallið OK.  Þegar niður af Kaldadal kom þá var skoðað sig um í Húsafelli.  Stórbrotið landslag þar.  Prófaði að lyfta Húsafellshellunni en náði henni ekki alveg upp.  Því næst var haldið sem leið lá að Hraunfossum og Barnafossi.  Þetta var tilkomumikil sjón, ægifagurt hvernig fossarnir koma undan hrauninu og svo aflið í Barnafossi, þvílíkt afl sem þarna er á ferð þegar Hvítá fossast um þennan þrönga farveg sinn.  Svo var haldið sem leið lá að Reykholti og sá merki staður skoðaður.  Þar komst ég að því að Snorri Sturluson hefur verið frumkvöðull, ekki bara í sagnaritun heldur líka því að hann hefur verið fyrsti Íslendingurinn sem er með heitan pott á pallinum hjá sér.  Eflaust hefur það hjálpað honum við að semja Edduna sína og einnig Heimskringlu.  Þarna hefur hann getað slakað á og hugsað næstu blaðsíður í þessum merku ritum.  Snorri hefur sannalega verið snjall maður.  Fyrsti Íslendingurinn til að eignast heitan pott.  Þegar Reykholt var útskoðað þá var haldið áfram og sveitir Borgarfjarðar skoðaðar þ.e.a.s. austan megin í honum.  Hvanneyrarstaður varð á vegi okkar.  Þaðan á maður margar góðar minningar þaðan frá því að maður var þar við nám undir lok síðustu aldar.  Alltaf gaman að koma á Hvanneyri.  Borgarnes var næsti viðkomustaður.  Sá staður hefur stækkað gríðarlega og er mjög snirtilegur og fallegur.  Frá Borgarnesi var haldið í átt að Reykjavík, en í staðinn fyrir að fara hina hefðbundnu gangnaleið til borgarinnar var ákveðið að keyra Hvalfjörðinn.  Þar sá maður áþreifanlega hvernig sú samgöngubót, sem Hvalfjarðargöngin eru, hefur breytt þeim áfangastöðum sem voru í Hvalfirðinum, þ.e. Ferstyklu, Þyrli og Botnskála.  Þarna sem allt iðaði af lífi fyrir nokkrum árum, er varla nokkurn mann að sjá í dag og engin greiðasala opin fyrir hinn almenna ferðamann, sem langar til að rifja upp keyrsluna fyrir Hvalfjörðinn.  Það er hálf eyðilegt að keyra þarna um.  Þegar til borgarinnar var komið var ákveðið að halda beint heim á Selfoss þar sem ferðaþreytan var að ná tökum á fólkinu og verulega tekið að halla degi.

Nóg í bili!

Eldjárn kveður!

Athugasemdir

[Arnar Gunnarssson (IP-tala skráð) 23.7.2007 kl. 12:43]

Legg til að þú takir mig með í svona ferð næst. Borgarfjörður er góður staður, þó Borgarnes sé vibbi.

Kleppjárnsreykjaskólasundlaug (já hún heitir það) er t.a.m. frááábær laug. Alltaf gaman að koma þangað. 

[Sigurjón Valgeir Hafsteinsson, 28.7.2007 kl. 11:21]

Ég og Ásdís kíktum inn í Hvalfjörð um daginn og þótti það bara nokkuð fínn bíltúr. Ákváðum að skoða Botnskála og mikið afskaplega er hann orðinn lúinn greyið....en annars var bara gaman að kíkja inn í fjörðinn og skoða sig um þar.